Bir hissə oxuHəyat eşqi
“Həyat eşqi” və “Tonqal qalamaq” hekayələri insanın çətin, ağır şəraitdə həyatda qalmasından bəhs edir. Cek London amansız təbiətin qoynunda tək-tənha qalan insanın aclıqla, dondurucu soyuqla mübarizəsini, onun tükürpərdici çarəsizliyini sərt, amma bir o qədər həyati üslubda təsvir edir. Bu kitabda soyuğu, şaxtanı iliyinə qədər hiss edirsən.
Həmişə təbiəti ram edən, ondan öz məqsədləri üçün yararlanan bəşər övladına bu dəfə təbiət meydan oxuyur. İnsanı özünə tanıtdırır, əsl xislətini üzə çıxarır. İnsan oxuduqca arzuları, qorxuları ilə üz-üzə qalır, yenidən əbədi sualları özünə verir. Hekayələrdə təsvirlər o qədər real, o qədər inandırıcıdır ki, həmin adsız qəhrəmanlarla empatiya qurmamaq mümkün deyil.
Bir çox hallarda həyatı komfortlu, rahat, təhlükəsiz olduğu halda sevən insan bəs, görəsən, həyatın qəddar üzü ilə qarşılaşsa, necə davranar, onu yenə də sevərmi? Cek London bizi bu ağır sualla qarşı-qarşıya qoyur.
“Alov həyat demək idi, sönməməli idi”.
| Kitabın adı | Həyat eşqi |
|---|---|
| Orijinal adı | Love of Life |
| Müəllif | Cek London |
| Tərcüməçi | Manaf Süleymanov |
| ISBN | 9789952849455 |
| Dili | Azərbaycan |
| Səhifə sayı | 72 |
| Kitabın formatı | 115x180 mm |
| Çap tarixi | 2023 |
| Nəşriyyat | Parlaq İmzalar |
Cek London
Cek London 1876-cı il yanvarın 12-də San-Fransisko şəhərində anadan olub. Əsl adı Con Qriffit Çeynidir. London uşaq yaşlarından böyük əzab-əziyyətlərə qatlaşır; o, San-Fransiskonun küçələrində ayaqqabı silir, qəzet satır, çay və okean gəmilərinin göyərtələrini yuyur, limanlarda yük vurub, yük boşaldırdı. 1896-cı ildə Kaliforniya Universitetinə qəbul olur. Ancaq maddi vəziyyəti pis olduğundan universiteti yarımçıq qoyur.
C. London təxminən 40-dan çox kitab yazır. Şəksiz, ən məşhur əsəri “Martin İden”dir (1909). Bundan başqa, dünya ədəbiyyatının əvəzolunmaz klassiklərindən sayılan “Ağdiş”, “Əcdadların harayı”, “Dəmir daban” da yazıçının uğurlu əsərləri sırasındadır.
Böyük yazıçı 1916-cı il noyabrın 22-də Kaliforniya ştatının Qlen Ellen şəhərində vəfat edir.
1 Rəy
Cek London mənim doğma hiss etdiyim yazarlardan biridir. Demək olar ki, kitablarının çoxunu oxumuşam. Ən tanış olan isə onun mübarizə aparan obrazlarıdır. Kitabın adının niyə ‘Həyat eşqi’ olduğu başlamazdan əvvəl mənə çox maraqlı gəlirdi, bitirəndə anladım. Bu kitabda mübarizədən daha çoxunu edən bir obraz var. Soyuq, aclıq, xəstəlik və ən dəhşətlisi tək olmaq. Mənim ‘bundan sonra yaşamaz’ dediyim hissələrdə, obrazın yaşam istəyinin bütün əzablardan daha güclü gəldiyi anlar var idi. Kitab kiçik həcmli olmasına baxmayaraq, məni tam hekayənin içərisinə apara bilmişdi. Mən o soyuğun hissiyatından donmuşdum, amma obrazımız hələ də nələrsə etməyə çalışırdı. Görəsən həqiqətən də o an belə güclü ola bilirik mi? İnsanın mübarizəyə davam edə bilməsi üçün problemləri geridə qoya biləcək güclü səbəbləri olmalıdır. Amma həmin an bunları düşünəcək qədər sağlıqlı beynimizin olduğunu sanmıram. Bəlkə də, ümid hissi mübarizəyə vadar edir) 1 saatlıq kitabdır, elə yolda bitirməlik. Mənim kimi Cek London qələmindən darıxmısınızsa, oxuyun. Az da olsa onun dünyasında olursunuz, bunun üçün əziz @parlaqimzalar -a təşəkkür edirəm