“Gün altında adamlar” romanı 1948-ci il İsrail-Fələstin müharibəsindən sonra öz torpaqlarından didərgin düşmüş üç nəslin – yaşlı Əbu Qeysin, gənc Əsadın və yeniyetmə Mərvanın taleyindən bəhs edir. Onların hər biri daha yaxşı bir gələcək və ailələrini xilas etmək ümidi ilə İraqdan Küveytə qeyri-qanuni yolla keçməyə çalışırlar. Lakin bu səfər avqust ayının qızmar istisində, bir su tankerinin qaranlıq və havasız dəmir çəni içində ölüm-dirim mübarizəsinə çevrilir.
Fələstinli yazıçı Qəssan Kənəfani ərəb ədəbiyyatının ən görkəmli nümayəndələrindən biridir. Özü də uşaq yaşlarında vətənini tərk etmək məcburiyyətində qalan Kənəfani bir xalqın ağrısını və müqavimətini həyati, eyni zamanda amansız bir hadisənin fonunda təqdim edir. 1972-ci ildə Beyrutda sui-qəsd nəticəsində öldürülən yazıçının əsəri bu gün də aktualdır.
“Gün altında adamlar” Fələstin xalqının itirilmiş hüquqlarını və faciəvi taleyini simvolizə edən ağrılı elegiyadır.