“Yaşamaq sənəti” kitabında yazıçı-psixoloq İlqar Kamil öz şəxsi təcrübələrini psixologiya, ədəbiyyat, sosiologiya kimi sahələrin yanaşmaları ilə sintez edərək bir xoşbəxtlik formulu ortaya çıxarır. 
Bu kitabdakı esselər loqoterapiya cəhdləridir; deyir darıxmayın, hər şey olmasa da, çox şey yaxşı olacaq və hər şeyin yaxşı olması, bəlkə, heç yaxşı da deyil. Bu kitab “insanın başına nə gəlirsə, başının içindən gəlir” deyir və esse-esse bu tezisi isbat etməyə çalışır. Bu esselər adamı “olarsa nə gözəl, olmazsa eybi yox” fəlsəfəsinə yaxınlaşdırır, izah edir ki, güclü görünməyə məcbur olmadığımız yerlərdə, kəslərdədir xoşbəxtlik. Bu kitab bizə gerçəkdən xoşbəxt ola biləcəyimiz ünvanları (bəlkə də, yeganə ünvanı) göstərir. 
“Yaşamaq sənəti” həm də bir akmeologiya kitabıdır, insana özünün akmesinə – ən ali versiyasına çatmağın yollarından danışır. Odur ki esse-esse irəlilədikcə cümlə-cümlə car çəkirsiniz: böyüməyə nə qədər, nə qədər yer varmış...