Mariya Montessori 1870-ci il avqustun 31-də İtaliyanın Kyaravalle kommunasında anadan olub. Orta təhsilini “Regia Scuola Tecnica Michelangelo Buonarroti” texniki məktəbində alıb. Buranı əla qiymətlərlə bitirən Montessori təhsilini “Regio Istituto Tecnico Leonardo da Vinci” institutunda davam etdirib. 1890-cı ildə institutu bitirəndə tibb təhsili almaq qərarına gəlir. XIX əsrin sonlarında italyan cəmiyyətində qadınların bu sahəyə maraq göstərməsi xarakterik deyildi.

1890-cı ildə Montessori Roma Sapientsa Universitetinə qəbul olub. 1892-ci ildə universiteti bitirən Montessori bir il sonra elə həmin universitetin tibb məktəbinə daxil olub. Montessori bu məktəbə qəbul olan ilk qadın idi.

Montessori dünyada öz unikal pedaqoji sistemi və metodu ilə tanınır. Onun tətbiq etdiyi metod, demək olar, bütün dünyada uşaqlara, təlim-tərbiyə ilə bağlı məsələlərə baxışı tamamilə dəyişdi. Hazırda bir çox ölkələrdə bu metod uğurla tətbiq olunur.

Montessori 1952-ci il mayın 6-da Hollandiyanın Nordveyk şəhərində vəfat edib.