Bir hissə oxuİblis
Azərbaycanın nəhəng filosof-şairi Hüseyn Cavid “İblis” əsərində əzəli bir mövzunu – Adəm övladı ilə İblisin mübarizəsini mükəmməl poetik qüdrətlə qələmə almışdır. Bu əsərdə insanın həmişəki kimi öz nəfsinə, ehtirasına yenilməsini, İblisin xəbis təbiətini böyük dramaturq bütün çılpaqlığı ilə nümayiş etdirir; Arifin çarəsizlik iniltisi, İblisin vahiməli qəhqəhəsi qulağımızdan getmir, ruhumuzu, mənliyimizi dərindən sarsıdır.
“İblis” Hüseyn Cavidin istibdada və bəşəri rəzalətlərə qarşı üsyanıdır, həcmcə kiçik olsa da, bəşəriyyətin qaranlıq tərəflərini, cəhaləti dolğun şəkildə əks etdirmək baxımından ölməz əsərdir. Dünyada baş verən müharibələri, zülmləri, qətlləri gördükcə istər-istəməz ürəyimizdə bu misraları deyəcəyik:
İblis nədir?
– Cümlə xəyanətlərə bais...
Ya hər kəsə xain olan insan nədir?
– İblis!..
| Kitabın adı | İblis |
|---|---|
| Müəllif | Hüseyn Cavid |
| ISBN | 9789952580679 |
| Dili | Azərbaycan |
| Səhifə sayı | 112 |
| Kitabın formatı | 115x180 mm |
| Çap tarixi | 2025 |
| Nəşriyyat | Parlaq İmzalar |
Hüseyn Cavid
Hüseyn Cavid 1882-ci ildə Naxçıvanda anadan olub. İlk ibtidai təhsilini evdə atasından alan, sonra isə 1891-1896-cı illərdə mollaxanada davam etdirən Hüseyn Cavid 1896-1898-ci illərdə görkəmli maarifpərvər ziyalı M. Sidqinin “Tərbiyə” məktəbində oxumuş, daha sonra isə regionun pedaqoji mərkəzlərindən sayılan Təbrizin “Talibiyyə” mədrəsəsinin müdavimi olmuşdur.
Cavid klassik şərq poeziyasından və Avropa romantizmindən ilham alaraq milli romantik dramaturgiyanın əsasını qoymuşdur. Onun “Şeyx Sənan” (1914), “İblis” (1918), “Peyğəmbər” (1922), “Topal Teymur” (1925), “Səyavuş” (1933) kimi əsərlərində azadlıq, bəşəriyyətin taleyi, zülmə qarşı üsyan və mənəvi təmizlənmə ideyaları ön plandadır. Böyük şair-dramaturq yaradıcılığında milliliklə ümumbəşəriliyi vəhdətdə təqdim etməyə çalışmışdır.
1937-ci ildə Stalin repressiyaları zamanı Cavidə qarşı “millətçi” ittihamı irəli sürülmüş və 1938-ci ildə Sibirin İrkutsk vilayətinə sürgün olunmuşdur. Uzun illərin mənəvi-psixoloji təzyiqlərindən sonra səhhəti pozulmuş və 1941-ci il dekabrın 5-də İrkutsk vilayətinin Tayşet rayonunda vəfat etmişdir. Nəşi 1996-cı ildə böyük ehtiramla Bakıya gətirilmiş və Fəxri Xiyabanda dəfn olunmuşdur.
İlk rəy yazan siz olun